Jay Xyooj

Kuv yog nam hab txiv Npuag Vaaj Xyooj tug tub hlub Jay Xyooj. Kuv puj hab kuv yawm yog Siv Yig Txawj Kum Xyooj nyob rua lub zog Pajqhas. Kuv yog yug luj hlub nyob rua peb lub zog St. Paul. Kuv muaj ob tug kwvtij hab ib tug muam.

Thaum kuv kawm ntawv qib sab taag, kuv lug ua ib tug xib fwb qha ntawv rua miv nyuas yau, hab ua num rua lug tsev kawm ntawv luj St. Paul Public Schools. Kuv twb lug ua cov dlej num nuav tau muaj 10 lub xyoos. Thaum kuv ua num rua nraag peb lub tsev dlawb MN House of Representatives, kuv tau lug nrug cov State Representatives hab State Senator ua kev cai paab nrhav nyaj txag lug txhawb tsev kawm ntawv, paab miv nyuas kawm ntawv zoo, paab pua dlaim txag rua nraag tsev dlawb State Capitol rua peb cov tub qub rog, paab sau cai nce nyaj kom suav dlawg tau laj kaam them nyaj zoo. Tsi taag le xwb, kuv tswj tau ob lub koos hum lug paab cov pejxeem dlub haus koj nrhav tau noj tau haus, tau vaaj tau tsev, hab txhawb nqaa cov xaav moog dlha ua tub txib ntxhais txib le lub rooj kuv yuav lug dlha nuav. Vim kuv twb tau ua cov dlej num nuav lawm, kuv tau ntaus kev phooj ywg rua lwm haiv tuabneeg hab tej nom tej tswv, puab suav dlawg pum zoo hab txham le txhawb kuv lug dlha lug ua mej ib tug tub txib State Representative rua koog 67B.

Yog kuv tau lug ua mej ib tug tub txib, kuv lub zeem muag yog lug sai kev cai paab nyaj txag lug txhawb peb cov miv nyuas kawm ntawv hab xib fwb kom puab qha tau ntawv zoo hab kawm tau ntawv zoo. Tsi taag le xwb, kuv yuav nrug mej txhua leej txhua tug thaam txug kev yuav nrhav laag luam hab laj kaam kuv suav dlawg tau noj tau haus. Kuv yuav lug sau cai khu peb lub zej zog kom zoo xis nyob hab txhob muaj tub saab tub nyag kom peb suav dlawg txhaj le nyob kaaj sab. Txuas ntxiv moog, kuv yuav moog sau cai lub paab khu cov kev cai has txug kev khu mob khu nkeeg kom nwg txhob kim kim hab nwg yuav paab tau suav dlawg nyob kaaj xeeb.

Thaum kawg nuav, kuv yog mej ib tug tub, kuv kawm ntawv hab twb lug ua cov dlej num nuav tau 10 lub xoos, yog mej pum kuv lub zeem muag zoo, kuv thov mej suav dlawg tuaj sawv kev ua ib tug delegate rua kuv kom tog phav Democrat txhawb kuv moog sib xub rua lub yim hli ntuj. Vaam hab ca sab mej yuav tuaj sawv kev rua kuv rua lub ob hlis ntuj nub tim rau thaum 6:30 tsaus ntuj nyob rua tom Harding High School.

Kuv yuav vaam mej txhua leej txhua tug muab mej tug dlaag tug zug, muab tswv yim, paab nyaj paab txaj txhawb kuv. Kuv yuav ncu mej tug txaj tug ntsig moog ib txhab ib txhis.

Yog mej muaj lug nug, hu tau rua kuv ntawm (651) 321-3820.

Ua tsaug ntau.

​Jay Xiong

[Kev pov ntawv hauv Minnesota]

Check "Share your address" for campaign donations.